حاسس انك واقف مكانك وكل يوم بيعدي ومفيش تغيير حقيقي بيحصل؟! طب لو قولتلك ان في حاجات بسيطه جدا لو طبقتها حياتك هتتغير تماما هتصدقني؟ 

في دراسه اتعملت ولقو فيها ان اكتر الاشخاص الناجحين في العالم بينهم حاجات مشتركه بسيطه جدا  مش عباقره ولا خارقين ولكن عندهم خطط ثابته وعادات يوميه قويه.

ودا اللي هنتكلم عليه في هذه المقاله هنتكلم عن ملخص كتاب نادي الخامسه صباحا هنستعرض مع بعض اهم الافكار والنصائح اللي ممكن تطبقها في حياتك عشان تطور نفسك وتعيش حياه متوازنه.

هنتكلم عن اداره الوقت وكمان التركيز وتطوير الذات وكمان اهميه الراحه. عايزك متنساش النجاح عباره عن رحله مش خطوه واحده بس او سلم تطلع منه هوب تلاقي نفسك ناجح!

ملخص كتاب نادي الخامسه صباحا

عشان تغير حياتك فانت محتاج روتين قوي وعادات تمشي عليها يوميا من بدايه ما تصحي تصحي امتى تصحي تعمل اي وكمان بعد الصحيان هتعمل اي واي الخطوات والحاجات اللي ممكن تعملها اثناء اليوم وازاي تخطط ليومك وكمان امتدادا لحد ما تيجي اخر اليوم تعمل اي وازاي تنام وهكذا كل دا هنتكلم عليه في هذه المقاله.

فوائد الاستيقاظ المبكر قبل الفجر

عمرك فكرت انك لو صحيت قبل الفجر ممكن حياتك تتغير؟! تخيل ان الوقت دا هو السر للصحه والفلوس والحكمه لو مش مصدق خلينا اقولك ازاي.

الصبح بدري دا هو اكتر وقت هايل واكتر وقت فيه تركيز ودا مش كلامي انا بس في دراسات بتقول ان الناس اللي بتصحا بدري والناس كلها نايمه دول اكتر ناس عندهم صحه نفسيه وجسديه. في الوقت دا مخك بيبقا صافي بتقدر تفكر بوضوح وتخطط ليومك وكمان تاخد قرار بشكل افضل وممكن تستغل الوقت دا في القراءه او الكتابه او حتى التأمل وكمان هتحس ان انت متقدم عن اي حد بخطوه هما نايمين وانت صاحي قاعد بتطور في نفسك وغير كدا كمان هتلحق صلاه الفجر جماعه جرب كدا لمده اسبوع وحرفيا حياتك هتتغير.

ماذا تفعل بعد الاستيقاظ من النوم

عمرك سألت نفسك اي المفروض اعمله بعد ما اصحي؟ ناس كتير بتفكر ان النجاح في مجرد انك تصحي بدري ولكن الموضوع مش ليس في انك تصحي بدري بس ولكن في انك هتعمل اي بعد ما تصحي بدري.

الوقت اللي تصحي فيه بدري هو اكتر وقت عقلك بيبقا مركز فيه ومرتاح فحقيقي لو اهتميت ببدايه يومك يومك هيعتني بالباقي وكمان هيبقا يوم مختلف جدا. طب ازاي بقا نهتم ببدايه يومنا؟ دا اللي هيخلينا ننتقل لقاعدة 20/20/20.

قاعده 20/20/20

هي قاعده بتساعدك انك تبدأ يومك بتركيز وطاقه وانك تكون مفعم بالحيويه فكرتها انك بتقسم اول ساعه في يومك لثلاث اجزاء :

الجزء الاول: مدته 20 دقيقه هتستغلها في انك تعمل رياضه زي الجري او رياضه خفيفه وانت واقف زي الضغط او البلانك حاجات بسيطه تساعدك انك تنشط الدوره الدمويه وكمان تديك طاقه.

الجزء الثاني: مدته 20 دقيقه هتستغلها في التعلم تقرأ حاجه جديده تسمع بودكاست مفيد.

الجزء الثالث: مدته 20 دقيقه هتستغلها في التأمل او انك تنعزل وتفكر مع نفسك بانفراد او انك تحدد الحاجات اللي انت عاوز تنجزها خلال يومك .

التقسيمه دي بتديك توازن بين جسمك وعقلك ونفسيتك وهتديك طاقه وتخلي يومك مليان انتاجية. فعاوزك تجرب الفكره دي لمده اسبوع وحرفيا هتحس بتغيير.

تأثير البيئه المحيطه علي إنتاجيتنا

بتحس ان يومك كله بيخلص ومش بتنجز حاجه فيه؟ الفكره مش في انك تشتغل اكتر الفكره انك تشتغل بشكل اذكي والفكره كمان في البيئه المحيطه بيك.

عمرك فكرت في اي اللي ممكن يقلل انتاجياتك؟ الفكره مش في الشغل بتاعك او انت بتشتغل ازاي الفكره بردو في البيئه المحيطه بيك اللي ممكن تأثر على انتاجياتك .

اول حاجه تعملها عشان توصل لدرجه تركيز عاليه انك تبعد اي حاجه تشتتك زي موبايل اثناء شغلك كتاب اي حاجه ممكن تشتتك لان كل ما كان المكان حواليك هادي ومكان مخصص للشغل بس دا هيخليك تنجز بشكل اكبر.

كمان الناس اللي حواليك بتأثر عليك زي مثلا لو في ناس بتشجعك او ناس بتحبك العلاقات بتأثر علينا بشكل كبير جدا. تخيل نفسك في مكان بسيط جدا مفيهوش دوشه ومعاك لابتوبك وعليه البرامج تبع الشغل بتاعك بس الشغل بتاعك هيبقا عامل ازاي؟ مش هيبقا بتركيز وهتنجز جامد! 

عاوزك تعمل الكلام دا في مكان شغلك الخاص بيك سواء كنت شغال من البيت او وظيفه او مكتب او بيئه عمل او حتي لو كان الشغل بتاعك هو تطوير نفسك. فالمكان يكون هادي وكمان  تحيط نفسك بالناس اللي تدعمك وبلاش تحيط نفسك بالناس اللي ممكن يحبطوك ومش بيطورو من نفسهم لانك هتكون نسخه منهم.

الجوانب الاربعه لتطوير الذات

فكره تطوير الذات يا شباب ان انت بتشتغل على اربع جوانب رئيسيه يعني مش خطوه واحده او سر معين بتعمله يخلي الذات بتاعك يطور لا للاسف هي عباره عن اربع جوانب بتشتغل عليهم ومش عاوز اقولك ان الموضوع كبير الموضوع بسيط جدا. انت هتشتغل على قلبك وعقلك وروحك وجسمك.

عاوزك تفهم ان عقلك دا زيه زي اي عضله في جسمك لو بطلت تستخدمها بتضعف وتكش نفس الكلام مع عقلك فلازم تديله حاجه جديده يتعلمها زي مثلا انك تقرأ كتاب جديد او تتعلم مهاره جديده او حتى تسمع بودكاست مفيد.

تاني حاجه تشتغل عليها قلبك لان قلبك دا اللي بيربطك بالناس يعني اي؟ يعني تقضي وقت مع عيلتك متخليش الشغل ياخد كل وقتك السعاده بتكون موجوده لما قلبك يكون مليان حب ودعم للناس اللي حواليك.

تالت حاجه هي الروح لان روحك هي اللي بتديك المعنى في الحياه فعاوزك كل يوم كدا تنعزل مع نفسك تحاسب نفسك تشوف انت قصرت في اي وانجزت اي في يومك واي الحاجات اللي كان ممكن تعملها بشكل افضل.

رابع حاجه هو جمسك عاوز اقولك انك من غير صحه مش هتقدر تعمل اي حاجه في حياتك فلازم الرياضه تكون في حياتك الرياضه مش رفاهيه الرياضه شئ ضروري جدا حتى لو 10 دقايق فقط هتبدأ بيهم يومك. زي انك تعمل رياضه خفيفه زي الجري وافضل حاجه انك تروح جيم وتعمل دايت صحي.

العيش بحماسه الموت لتحقيق الاهداف

فيه حاجه مهمه عاوز اطرحها عليك لو عرفت ان حياتك بوقت محدد هتعيشها ازاي؟ حرفيا اي حاجه ممكن تغير في حياتنا في لحظه واحده فلازم نفكر هل احنا فعلا احنا عايشين حياتنا بوعي ولا بنضيع وقتنا في حاجات تافهه وملهاش اي اهميه؟

الفكره مش بس انك تطور نفسك الفكره انك تعيش كل يوم كانه اخر فرصه ليك تخيل لو حد قالك ان النهارده دا اخر يوم في حياتك هتقضيه ازاي؟

هل هتقضيه على التفاهات ولا هتقضيه في الحاجات اللي تطورك والحاجات اللي تنفعك زي مثلا الصلاه عشان انت خلاص هتموت فلازم تصلح اللي بينك وبين ربنا وتعمل عبادات تديك حسنات عشان هتقابل رب كريم.

او انك تهتم بالعلاقات زي الناس القريبه منك مش تهتم بالحاجات اللي هتضيع وقت زي الفديوهات القصيره او الحاجات اللي زي كدا اظن هتهتم شوي انك تحسن من نفسك في اليوم دا وانك هتكون انسان صالح وشئ كويس.

هي دي الفكره انا عاوزك تعيش كل يوم على انه اخر يوم ليك في الحياه فتهتم بالوقت جدا بيروح فين بالظبط لما تعيش بحماسه الموت وان كل يوم هو فرصه جديده ليك في الحياه هتطور من نفسك جامد.

عاوزك تسأل نفسك اول ما تصحي من النوم سؤال اي هي الحاجه اللي ممكن اطور نفسي فيها النهارده؟

الخروج من منطقه الراحه

اهم حاجه كمان في رحلتك في تطوير ذاتك انك تطلع من منطقه الراحه لان المنطقه دي بتخليك ريلاكس ومش بتتطور وكمان الوقت بيتسرسب منك وكمان النمو العقلي بيحصل لما تطلع من منطقة الراحه وتجرب حاجه جديده حاجه مختلفه تدخل نفسك في تحدي صعب زي انكتتعلم مهاره جديده مثلا كل دا بيفيدك.

لان لما بتعمل كدا عقلك بيبدأ يتكيف على الطريقة الجديدة اللي انت قاعد تستخدمه بيها وكمان حلك للمشكلات بيكون اسرع وقراراتك بتكون افضل.

الموضوع مش كبير زي مانت فاكر هو عباره عن خطوات بسيطه زي مثلا انك تتعلم لغه او انك تتعلم مهاره جديد او انك تقرا كتاب جديد يفيدك او تعمل نشاط جديد زي الرسم والكتابه وكل الحاجات دي هتحط نفسك في تحدي وكمان هتشغل عقلك.

التخطيط الجيد لليوم

اكيد هتقابلك مشكله ان اليوم بتاعك بيعدي وحاسس انك مأنجزتش السر فين؟ 

السر في تنظيم وتخطيط اولوياتك خليني اقولك ازاي, النجاح مش انك تشتغل كتير النجاح انك تشتغل بذكاء وتدي كل حاجه حقها ابدأ يومك عن طريق انك تنظم وقتك عن طريق انك تحدد المهام او الحاجات المهمه اللي لازم تعملها النهارده يعني اي؟

يعني المهمات اللي انت بتحطها تكون كبيره ودي هتعرفها عن طريق انك تسأل نفسك اي هي الحاجه اللي لو عملتها هتفرق النهارده فيا او اي الحاجه اللي لو انا عملتها هتقدمني خطوه في تحقيق حلمي؟

عاوزك تاخد بالك برضو ان الاشخاص الناجحين مش بس بيتشغلو على الاهداف الكبيره لكن بيهتمو ايضا بصغائر الامور يعني عاوزك وانت بتشتغل او في نهايه اليوم تسأل نفسك اي اللي كان ممكن اعمله افضل واحسن فيه. 

دا اللي هيخليك بروفيشنال ولكن مش عاوزك تقع في خطأ المثاليه بمعني ان انت عاوز الحاجه بتاعتك تبقا مثاليه انها تطلع بافضل حاجه ولكن للاسف هتلاقي نفسك بتضيع في الوقت فحاول توازن الامور.

الموازنه بين العمل والراحه

في حاجه مهمه هنتكلم فيها وهي ان في ناس كتير بتفكر ان النجاح هو عباره عن انك تشتغل 24 ساعه ولكن للاسف دا غلط لان الراحه مهمه جدا عشان تقدر تواصل لشغل اليوم اللي بعده واللي بعده وهكذا وكمان الراحه مهمه عشان الشغل بتاعك يبقا منتج.

لان انت لو مرتحتش بعد ساعات عمل طويله للاسف الشغل بتاعك هيكون اقل تركيز وهتلاحظ ان انت بتشتغل بشكل ابطأ ودا هو السر في انك بتحس ان اليوم بتاعك بيخلص وانك مش بتنجز فيه.

مهم جدا تاخد فترات راحه بعد ساعات عمل طويله وكمان تاخد ساعه راحه على الاقل في نهايه اليوم عشان تقدر تشحن طاقه عشان تشتغل اليوم اللي بعده بشكل افضل ويكون عندك تركيز وراحه جسدية انك تشتغل تاني اليوم اللي بعده.

نهايه اليوم بقدر اهميه بدايه اليوم

ناس كتير بتفكر ان بدايه اليوم دا اهم حاجه ولكن للاسف ميعرفوش ان نهايه اليوم بنفس قدر اهميه بدايه اليوم وان نجاح اليوم التالي اللي احنا بنتكلم عنه في نهايته دا بيعتمد على انك عملت اي في اليوم اللي قبله عاوزك تعمل روتين ثابت لنفسك وتكون صريح مع نفسك وتقعد تعمل لنفسك جلسه تأمل او تفكير مع نفسك هتقول لنفسك اي اللي انا انجزته النهارده واي اللي كان ممكن اعمله بشكل افضل.

وغير كدا كمان عايزك تستغل الوقت الاخير من يومك انك تقرأ حاجه جديده لي بقا؟ لان القراءه هتنعسك فاكرين لما كنا بنذاكر اخر اليوم او قبل ما ننام كنت تحس كدا ان النوم نزل عليك بسرعة 300 كيلو في الساعه فاحنا عاوزين نلعب على الموضوع دا انك تمسك كتاب تقرأ فيه وكمان تبعد عن اي حاجه فيها اضاءه خالص زي الموبايل او الشاشات بانواعها لان الاضاءه اللي بتطلع من الشاشات للاسف بتأثر على نومك وتخليك تصحي جسمك همدان وجسمك مفيهوش طاقه وكمان بتخليك تنام بشكل ابطأ او تتعب وتعمل عندك ارق تخليك متعرفش تنام.

وكمان ممكن تخطط لليوم التالي ودا هيفيدك جدا ان اليوم بتاعك هيكون مخطط ومنظم عارف هتعمل اي وعارف مش هتعمل اي.